Autoritetet zvicerane po i mbështesin nismat e shoqërisë civile për një luftë efektive kundër radikalizmit dhe ekstremizmit në Zvicër.
Gjatë këtij viti, Konfederata do të mbështesë gjashtëmbëdhjetë projekte, si pjesë e planit kombëtar të veprimit për të luftuar radikalizmin dhe ekstremizmin e dhunshëm (PAN). Në periudhën prej pesë viteve është planifikuar një shumë prej pesë milionë frangave, për të forcuar përpjekjet e autoriteteve dhe shoqërisë civile.
Programi kombëtar i stimulimit, në vitin 2019 bëri të mundur që të kontribuojë në financimin e nëntë projekteve të ngritura nga autoritetet kantonale, qytetet, si dhe organizatat e shoqërisë civile. Shumat e kërkuara kanë tejkaluar shumë milionët e frangave të alokuara, komunikoi të premten Rrjeti i Sigurisë Kombëtare zvicerane, informon Shtegu.com.
Nga ana frankofone, për punën e tyre të parandalimit nga kjo kanë përfituar kantonet Vaud dhe Gjeneva, si dhe shoqata teatrore shqiptare „Kurora“ e Nyonit (VD) dhe shoqata Tasamouh në Bienne (BE), aktive kundër indoktrinimit fetar.
Këtë vit, u zgjodhën gjashtëmbëdhjetë projekte. Kantonet dhe qytetet, për shembull, do të mbështeten për prodhimin e broshurave elektronike, të destinuara për shërbimet sociale dhe punonjësit socialë në fushën e rinisë. Unioni Vaud i shoqatave myslimane do të ndihmohet në aktivitetet e tij të parandalimit, si dhe Këshilli Zviceran për Aktivitetet e Rinisë.
Instituti i Ndërtimit të Koalicionit Kombëtar (NCBI) do të trajnojë refugjatët të bëhen ndërtues të urave dhe të promovojnë tolerancën. Universiteti i Fribourg-ut do të mbështetet për trajnime mbi klerizmin mysliman në institucionet publike. Qendra Zvicerane për Kompetencën në Zbatimin e Sanksioneve Penale do të përgatisë një doracak për zbulimin e hershëm të sjelljeve të rrezikshme në burg.
Programi kombëtar i stimulit është në fuqi deri në verën e vitit 2023. Kërkesat për mbështetje për projektet e zbatuara në 2021 mund të paraqiten në Zyrën e Rrjetit të Sigurisë Kombëtare nga 1 Prilli deri më 30 Qershor 2020. Informacione të tjera janë në dispozicion në faqen e internetit të Rrjetit të Sigurisë Kombëtare www.rns.admin.ch.