17:54:22 2016-10-30
Një grup shoqatash shqiptare dëshiron të ofrojë një monument të Shën Terezës në qytetin e Lozanës në Zvicër, por ky proces është paksa i vështirë.
„Shën Tereza është një figurë universale, një mesazh i paqes, por nuk është e mirëseardhur në hapësira publike“, shprehet me keqardhje për „20 Minutes“ Gjergj Prenkoçaj, përcjellë „Shtegu.com“. Ai nuk e ka të qartë përse nuk mund të gjendet ndonjë hapësirë ku do të vendosej shtatorja e asaj që sakrifikoi tërë jetën e saj për të shpëtuar indasit në nevojë dhe e cila u shenjtërua më 4 shtator të këtij viti.
„Qyteti është shumë i kujdesshëm gjatë vendosjes së shtatoreve të personaliteteve në hapësirat publike“, ka pohuar kryetari i Komunës, David Payot. Kemi shqetësime më të mëdha të neutralitetit se sa në shekujt e kaluar. Këtyre viteve të kaluar kemi pasur propozime për të vendosur shtatoren e Nënës Sofi, një grua e rëndësishme për qytetin e Lozanës, apo për të emërtuar një rrugë me emrin e Nelson Mandelës. Por, kjo gjë nuk ndodhi. Shpresoj që kjo shtatore e Shën Terezës të vendoset në ndonjë hapësirë të kishës, por jashtë saj, në mënyrë që të jetë në disponim për të gjithë. E gjithë kjo, pasi ky projekt përparon dialogun ndërfetar“.
E gjithë kjo filloi në muajin mars të këtij viti, kur Papa Francesku e kishte paralajmëruar shenjtërimin e besimtares shqiptare, ndërsa kosovari i cili tash e 25 vite është duke jetuar në Zvicër dhe është katolik, i kishte vënë vetes për qëllim që të vendosë shtatoren e bronxit në Lozanë. Përmes disa shoqatave, ai tuboi një fond me të cilin e përpunoi një shtatore për ate e cila e fitoi Çmimin Nobel për paqe në vitin 1979.
„Ne i propozuam Këshillit të Famullisë së Kishës Notre-Dame, në rrugën Valentin“, vazhdon më tej Gjergj Prenkoçaj. „Ajo do të kishte qenë e përkryer po të vendosej në pjesën e jashtme të Bazilikës. Por, kjo gjë nuk na u miratua me pretekst se në këtë pjesë do të realizoheshin punime për dy vite me radhë“.
Edhe Ibrahim Syla, një veprimtar tjetër mysliman shqiptar i cili ka investuar shumë në këtë projekt, është shqetësuar shumë që shtatorja e humanistes shqiptare është vendosur në një kishë: „Shën Tereza nuk i takon as katolikëve, as shqiptarëve e as indasve. Ajo është e të gjithë neve“, përfundon Ibrahim Syla.