11:42:04 2019-04-12
Një banor i lagjes Gotthelf të Bazelit, në të cilën fëmija shtatëvjeçar shqiptar, Iliasi i vogël u godit me thikë nga një e moshuar 75-vjeçare në muajin mars, dëshiron të vendosë një pllakë përkujtimore që do të përkujtonte tragjedinë.
Edhe tri javë pas vrasjes makabër në Bazel, kur 75-vjeçari A. F. e theri shtatëvjeçarin Ilias M., me një thikë duke e shuar jetën e fëmijës, në vendngjarje në St. Galler-Ring, ende mund të vërehet një det me lule që përkujton tragjedinë e rëndë. Por, herëdo-kurëdo, lulet dhe qirinjtë përfundimisht do të zhduken, shkruan „20 Minuten“, përcjell Shtegu.com. Për të mos u harruar tragjedia, në vendngjarje duhet të ngritet një pllakë përkujtimore. Këtë veprim e kërkon një peticion online në platformën Petitio.ch.
„Unë dhe shumë persona të tjerë, me këtë peticion kërkojmë që qyteti i Bazelit, në vendin e tragjedisë në lagjen Gotthelf në St. Galler-Ring në Bazel, të vendosë një pllakë përkujtimore për Ilias M.“. Kërkuesi nga lagja Gotthelf e ka shprehur dëshirën e tij me një fjali.
Mbetet e paqartë nëse qyteti e ka dëgjuar apo jo banorin zviceran, informon Shtegu.com. Elementët përkujtimorë publikë zakonisht u dedikohen figurave dhe ngjarjeve historike. Por kjo nuk do të thotë që një pllakë përkujtimore për Iliasin e vogël nuk do të ketë gjasa. „Peticioni kërkon një vizion të organit kompetent për t’iu përgjigjur“, thotë zëdhënësi i qeverisë komunale, Marco Greiner për „BZ Basel“, njofton Shtegu.com.
Autorja e krimit është edne në paraburgim, ndërsa hetimet psikologjike janë duke u kryer. Tek 75-vjeçarja A.F. ekzistojnë dyshime për aftësi të fajësisë. Për dekada të tëra, gruaja ishte ndjerë si viktimë e autoriteteve dhe gjakderdhjen e arsyetoi me faktin se ajo donte të dëgjohej, sepse askush nuk po ia vinte veshin.