LAJME

Për herë të parë në historinë e komunikacionit zviceran: Asnjë gjobë nga radari

56 Lexime

Dorën në zemër, vozitësit e qytezës Bubikon në Zvicër, duhet të shpallen më të kujdesshmit në planetë, duke pasur parasysh se në këtë shtet rregullat e komunikacionit janë tepër të ashpra. Gjatë një kontrolli të shpejtësisë, vozitësit kanë qenë shumë të kujdesshëm në vozitje dhe për herë të parë në Zvicër nuk është shqiptuar ndonjë dënim.
Ngjarja kishte ndodhur më 28 mars të këtij viti, kur policia kishte vendosur një radar për matjen e shpejtësisë në Bubikon, duke konstatuar se asnjë pjesëmarrës i komunikacionit nuk e kishte tejkaluar shpejtësinë e duhur. Midis orës 16.00 e 17.00, në rrugën Kämmoosstrasse në drejtim të qytezës Rüti, ishin regjistruar 110 vetura. Nga këto, asnjëra nuk e kishte tejkaluar shpejtësinë e duhur, ka konstatuar me krenari, gjatë të premtes Këshilli komunal i kësaj qyteze.
Përndryshe, paralajmërimi i pjesëmarrësve për vendndodhjen e radarëve të shpejtësisë në Zvicër është rreptësisht i ndaluar. Policia kantonale e Cyrihut, gjatë muajit maj të këtij viti kishte denoncuar njëmbëdhjetë pjesëmarrës të komunikacionit, të cilët përmes Facebookut i kishin paralajëmruar të tjerët për vendndodhjen e radarit. Ata do të duhet të llogarisin me një dënim prej disa qindra frangave zvicerane.