08:58:43 2016-04-22
Amiri u shua shumë i ri, në moshën më të njomë të jetës, duke lënë pas vetes një shembëlltyrë për bashkëmoshatarët e tij. Na tronditi pa masë, pasi askush nuk e priste që të dorëzohej kundër kësaj beteje të rëndë, mes jetës dhe vdekjes. Na tronditi pasi afati për t`i ndihmuar kundër sëmundjes, ishte shumë i shkurtër, ndërsa shumica kishin shprehur gatishmërinë për të ndihmuar.
Nuk ka të ndalur e pamja në shtëpinë e prindërve të tij. I madh, e i vogël, i pasur e i varfër, pleq e të rinj e kanë vërshuar shtëpinë e tyre për t`ju shprehur ngushëllime. Një ngushëllim special vjen edhe nga Parisi, nga Klubi i mundjes „US Metro Lutte“, të cilin është duke e udhëhequr bashkatdhetari ynë, Hamdi Adili. Ai në faqen e tij në Facebook, njofton se ekipi i tij e ka përkujtuar humbjen e Amirit, duke i shprehur ngushëllimet më të sinçerta familjes së tij. Të njëjtin postim e ka bërë edhe në gjuhën frenge, duke i dhënë jehonë ndërkombëtare.