Maqedonasi pagoi hamburgerin 1.300 euro
20:53:08 2016-08-14
Emocionet për të vizituar sa më shpejt vendlindjen, i kushtuan shumë shtrenjtë shtetasit maqedonas: Në një restorant Fastfood në Rheinfelden, ai e harroi portofolin, i cili u gjetë nga një bashkëpunëtor i restorantit, por përsëri u zhdukë. Tashmë është duke hetuar edhe policia gjermane.
Jovanço Kostovski jeton në Singen të Gjermanisë. Gjatë rrugës prej Bazelit nëpër Rheinfelden, e kishte kapluar uria. Ushqimi do të përfundonte shumë shpejt dhe shumë lirë, prandaj vendosi të ushqehet në Fastfood restorantin në rrugën Schildgasse. Se sa kohë do t`i merrte dhe sa i shtrenjtë do t`i dilte, ai asnjëherë nuk kishte mundur ta paramendojë. Bile, tashmë është duke hetuar edhe policia gjermane, shkruan „Badische Zeitung“, njofton „Shtegu.com“.
Gjatë pagesës së ushqimit, ai e harroi portofolin e tij në banak. Duke mos e hetuar, gabimin, vazhdoi më tej rrugën. Vetëm kur arriti në Schaffhausen, iu kishte kujtuar për portofolin. Por, një thirrje nga restoranti, ia kishte lehtësuar gjendjen: Një bashkëpunëtor i restorantit e kishte gjetur portofolin dhe ai tashmë gjendej në zyrë. Kostovski kthehet sërish në Rheinfelden. Por, udhëheqësja e ndërrimit të restorantit nuk e kishte gjetur më portofolin në zyrë. Pas deklaratave të ndryshme e të çuditshme të personelit, ai e informon menjëherë policinë.
Zëdhënësi i policisë gjermane në Rheinfelden, Dietmar Ernst, ka konfirmuar se kanë filluar hetimet për përvetësimin e pronës së gjetur. Kostovski nuk beson se do të gjendet portofoli i tij, në të cilin kanë qenë letërnjoftimi, dy karela bankare, patentë shoferi, kartela e sigurimit dhe 200 euro para të gatshme. Por, humbja e portofolit mund t`i kushtojë shumë më tepër: „Më e keqja është se nga sot (e premte) ia fillova pushimit dhe dëshiroja të shkoja me veturë në Maqedoni. Me humbjen e patentë shoferit, unë nuk mund ta drejtoj veturën dhe është dashur të siguroj për nesër një biletë avioni“. Bileta kthyese për dy persona, atij do t`i kushtojë 950 euro. Së bashku me të hollat dhe shpenzimet për pajisjen me dokumentacionin e humbur, ai llogaritë një shumë prej 1.300 eurosh.
Hidhërimi i tij bëhet edhe më i madh, me faktin se portofoli i tij njëherë u gjendë në restorant, por mandej ishte zhdukur. Kostovski iu kishte drejtuar edhe qendrës së këtyre restoranteve në Gjermani, por nga atje i kishin thënë se nuk mund t`i ndihmojnë.