06:26:48 2017-01-17
Kryebashkiaku i sapozgjedhur i qytetit të Bernës, Alec von Graffenried të hënën ka filluar ditën e parë të punës në këtë post. Ai u zgjodhë me 58 për qind të votave si udhëheqës i kryeqytetit helvetik, në një „dyluftim“ me kandidaten nga radhët e SP-së, Ursula Wyss dhe për herë të parë këtë post e merr një anëtar i Partisë së „të gjelbërve“. Duke dëshmuar se do të punojë në përforcimin e tolerancës ndërfetare, Alec von Graffenried që në ditën e parë të punës ka vizituar papritmas xhaminë shqiptare në Bernë, së bashku me anëtarin e qeverisë lokale Reto Nause, njofton „Shtegu.com“. Ishte një befasi vërtetë e këndshme për imamin e kësaj xhamie, Hoxhë Mustafë Memetin, i cili këtë vizitë e ka manifestuar përmes profilit të vet në Facebook: „Ishim të befasuar dhe u nderuam nga vizita e kryetarit tonë të ri. Ne i dëshirojmë një fillim të mirë në punën e tij të re si kryebashkiak i kryeqytetit të Zvicrës“, ka shkruar imami shqiptar nga Berna.
