Helikopterë me skuadra të specializuara shpëtimi drejt Durrësit ka nisur edhe Kroacia. Këtë e ka bërë të ditur kryeministri kroat, Andrej Plenkoviq, pas një bisede telefonike që ka pasur me kryeministrin e Shqipërisë, Edi Ramën.

“Pas një bisede që pata me kryeministrin e Shqipërisë, Edi Ramën, shpreha ngushëllimet e mia për familjet e viktimave pas tërmetit të fortë që ka goditur Shqipërinë. Gjithashtu është marrë vendim ( nga Qeveria e Republikës së Kroacisë) që të dërgohet një skuadër e specializuar shpëtimi drejt Shqipërisë me helikopter”, ka shkruar Plenkoviq.

Shqipëria është goditur sot nga një seri e fortë tërmetesh që kishte filluar rreth orës 4 të mëngjesit, ndërkohë i fundit në Detin Adriatik është regjistruar para pak minutash në orën 14:05 minuta prej 5.0 shkallësh.

Deri tani sipas informatave zyrtare janë të vdekur 13 persona, dhe të lënduar mbi 700 të cilët kanë kërkuar ndihmë në emergjencë./fishmedia