Krahasimi qesharak i kubes me minaren shkakton tallje tek lexuesit zviceran

18:40:10                     2019-05-24

Ndërtimi i planifikuar i një kubeje në „Shtëpinë e religjioneve“ në Bernë të Zvicrës, ka shkaktuar tronditje në radhët e Partisë SVP. Por, shumica e lexuesve si duket nuk e kuptojnë problemin.

Një kube e lartë tre metra e gjysmë, së shpejti pritet të ndërtohet mbi çatinë e Shtëpisë së religjioneve në Europaplatz të Bernës, shkruan „20 Minuten“, përcjell Shtegu.com. Një plan të tillë e ka përgatitur shoqata myslimane e Bernës. Ndër të tjera, kubeja do të shërbejë si një udhërrëfyes për vizitorët e xhamisë lokale.
Megjithatë, ndërtimin e kubes së planifikuar, Partia zvicerane SVP e sheh jo si një udhëzues, por provokim. Ndërtimi i vogël, i cili do të ndërtohet mbi objekt, e shqetëson pa masë partinë. Për laikët, ajo duket një minare; me ndërtimin e saj do të anashkalohet Ligji për ndalimin e ndërtimit të minareve, dyshojnë politikanët. Prandaj, SVP parashtron ankesë kundër projektit të ndërtimit.

Reagimi i SVP-së ka shkaktuar indinjatë tek lexuesit e „20 Minuten“. Për shembull, reagimet për ndërtimin e kubes, lexuesi D. K. i sheh si të ekzagjeruara. Ai shkruan: „Jeto dhe na lini të jetojmë“. Të tjerët nuk mund të paramendojnë minare në kuben e planifikuar, përcjell Shtegu.com. „A e dinë ata vallë se minareja është një kullë?“, pyet lexuesi Cuoco.

Mirëpo, ka edhe lexues të tjerë që pajtohen me SVP-në. Edhe kubeja për ta nuk është tërheqëse. Lexuesi Jan ka shkruar: „Kjo është jashtë diskutimit, nuk vjen parasysh një kube e tillë!“.