Kabrioleti zviceran jepet falas, askush nuk interesohet për te

16:36:20                     2016-04-06

Në Rorschach SG të Zvicrës, gjithçka mund të gjendet falas: Qytetarët jo vetëm që në rrugë ofrojnë divane dhe mobilja falas, por edhe vetura.

„Nuk ka diçka, që nuk ka“, ka shkruar të mërkurën një përdorues i rrjeteve sociale. Ai aludonte në një veturë të llojit „Opel“, i cili tash e disa ditë është duke qëndruar në rrugën „Franklinstrasse“ në një vendparkim publik. Në veturë është ngjitur një mbishkrim në të cilin shënon „falas“. Xhamat e veturës së dëmtuar lehtë janë të hapur dhe i mungojnë autotargat dhe celësat.

Për ofrimin e kësaj veture janë befasuar edhe banorët e „Franklinstrasse“. „Është kurioze që një veturë, pa autotarga, me ditë të tëra është duke qëndruar në rrugën tonë“, ka pohuar për „20 Minuten“ një banor i rrethit, njofton „Shtegu.com“. Edhe një tjetër banore ka dëshmuar se vetura që nga e premtja është duke qëndruar e parkuar në rrugë, por që askend nuk e ka interesuar shumë.

Policia tashmë ka njohuri për veturën e braktisur. „Jemi informuar nga popullata për `kabrioletin`“, ka deklaruar Hanspeter Krüsi, zëdhënës i policisë kantonale të St. Gallenit. Përmes numrave serikë të veturës policia ka arritur të gjejë pronarin e veturës, i cili para pak kohësh është zhvendosur nga afërsia. Sipas zëdhënësit, pronari i veturës nuk e ka ngjitur mbishkrimin „falas“, por me siguri ndokush ka tentuar të bëjë shaka.

Në parim, parkimi i një veture pa autotarga në vendparkim publik, në Zvicër është i ndaluar. Policia tashmë i ka dhënë një afat pronarit që ta largojë veturën, përdryshe duhet të llogarisë në përballje me ligjin.