Ja përse sulmuesi gjerman i vrau shqiptarët e rinj në Mynih

32 Lexime

22:23:13                 2017-03-18

 

 

 

 

 

 

Motivi i vrasjes së dhjetë personave në Mynih të Gjermanisë, që ndodhi gjatë muajit korrik të vitit të kaluar, sipas hetuesve gjermanë ka qenë ngacmimi i tepërt i sulmuesit nga ana e personave nga Europa Juglindore.

 

 

 
David S. me vite të tëra ka qenë i ngacmuar nga shokët e tij të klasës, thuhet në raportin përfundimtar të hetuesve gjermanë. Ndaj personave të Europës Juglindore tek ai është zhvilluar urrejtja e madhe, prandaj shumica e të vrarëve kanë qenë mu nga ky rajon dhe kryesisht shqiptarë nga Kosova.

 

 

 

 

Për David S., deri në kryerjen e veprës më 22 korrik 2016 në qendrën tregtare, për një periudhë të gjatë ka qenë një mani e vërtetë, ka pohuar prokurori gjerman Hans Kornprobst, në përfundim të hetimeve, shkruajnë mediet gjermane, njofton „Shtegu.com“. Për tetëmbëdhjetëvjeçarin gjerman, personat e tij të urryer kanë qenë të infektuar me një virus dhe vetëm në këtë mënyrë botëkuptimi i tij do të shkatërrohej.

 

 

 

Në një filial të qendrës tregtare, për 40 minuta të tërë ai i kishte vëzhguar vizitorët. Më pas kishte shkuar në tualet, e merr pistoletën nga valixhja dhe i sulmon gjashtë tinejxherë, të cilët për nga fizionomia i kishin përngjarë në persona nga Europa Juglindore. Me këtë rast, ai vret dy vajza 15-vjeçare, dy të tjera 14-vjeçare dhe një 14-vjeçar. Vetëm një fëmijë trembëdhjetëvjeçar me plagë të rënda kishte arritur të arratisej nga të shtënat e mëtutjeshme.

 

 

 

Në fillim të masakrës, David S. kishte shtënë 18 herë, ndërsa më pas janë dëgjuar edhe 41 të shtëna të tjera, ndërsa ai e kishte humbur mendjen dhe nuk i zgjedhte më viktimat. Edhe katër të tjerë u vranë, ndërsa shumë të tjerë u palgosën, disa prej të cilëve me plagë të rënda.

 

 

 

Prindërit e vet kanë qenë në dijeni për problemet psikike të fëmijës së tyre, por asnjëherë nuk e kishin imagjinuar një akt kaq të rëndë. Edhe për blerjen e armës nuk kanë pasur njohuri, pasi ai i kishte kursyer me vite të tëra 4.000 euro. Mësuesit dhe nxënësit e shkollës gjithashtu nuk kanë dyshuar për ndonjë sjellje të tij të pazakonshme. Pasi e kishte blerë armën, ai kishte ushtruar për të shenjuar në bodrumin e një ndërtese në Mynih, duke shkrepur 107 plumba.

 

 

 

Në lidhje me këtë, tashmë është akuzuar personi i cili atij ia ka shitur armën dhe i cili rrezikohet të dënohet me disa vite burg.