Ja mënyra se si bëjnë gara vozitësit zviceranë nëpër autostradat gjermane

14:03:16      2015-12-26

Ata e frenojnë komunikacionin me një tempo prej 40/km në orë, për të pasur rrugën e hapur, e më pas e rrisin shpejtësinë: Vozitësit zviceranë kanë organizuar disa gara ilegale nëpër autostradën gjermane A5.

Sipas një komunikate të policisë gjermane, një vozitës anonim i kishte informuar se në autostradën A5 në mes të Bazelit dhe Bad Krozingenit, ai kishte vërejtur disa vetura me autotarga zvicerane të cilat kishin zhvilluar gara me shpejtësi marramendëse.

Për të pasur rrugën e hapur, dy nga veturat e tyre e bllokojnë komunikacionin duke ecur paralelisht në dy korsitë, me shpejtësi prej 40 km/h. E gjithë kjo dëshmon se sa e rrezikshme është manovra të cilët e ushtrojnë vozitësit zviceranë, shkruan „Badische Zeitung“, njofton „Shtegu.com“.

Në këtë mënyrë, vozitësit zviceranë u mënjanohen dënimeve të rrepta eventuale që do të mund të pësonin nëpër autostradat zvicerane, në këtë rast bile edhe dënimit me burg. Tashmë, policia gjermane është në kërkim të dëshmitarëve të cilët do të identifikonin vozitësit e shpejtë. Gjatë këtij viti, policia ka parashtruar 40 aktpadi penale për gara të tilla.