Ish tenistja numër një në botë e shqetësuar për refugjatët

Njëra ndër tenistet më të suksesshme në botë, Steffi Graf (46), njëherit edhe themeluese e Fondacionit „Children for Tomorrow“ e cila përkujdeset për fëmijët e traumatizuar, është e brengosur me fluksin e vazhdueshëm të refugjatëve.
„Janë persona të cilët largohen nga vendet e veta për shkak të kushteve të rënda, apo i dërgojnë fëmijët e tyre, për shkak të rrethanave aq të këqija, sa që jeta e tyre është në rrezik, por jo gjithmonë ata pranohen“, ka deklaruar ish tenistja numër një në botë, për revistën për femra, „Tina“. Situata i kërcënon organizatat ndihmëse që të stërngarkohen. Lista e pritjes e fondacionit të saj është shumë e gjatë.
„Ne kishim aq shumë fëmijë nga Afganistani, Siria dhe Afrika, para dramës së refugjatëve në Mesdhe, sa që nuk mund të arrijmë të përkujdesemi për të gjithë“.
Fondacioni „Children for Tomorrow“ sipas të dhënave të saj, përkujdeset për projekte në Hamburg, në Kosovë, në Eritrea dhe Ugandë. Bashkëpunëtorët e fondacionit përkujdesen për shërimin e dhembjeve shpirtërore, të cilët fëmijët i kanë fituar gjatë luftës, dhunës, zhvendosjes apo humbjes së familjes.