Kumanovarët e “Lagjes së Trimave”, që kanë pësuar dëme gjatë luftimeve dyditore mes policisë dhe grupit të armatosur, si duket do të përjetojnë fatin e njëjtë sikur shqiptarët e Gjorçe Petrovit. Kjo për shkak se BDI ka garantuar ndihmë për dëmet e përjetuara materiale. Duek pasë parasysh se çdo herë kur BDI ka garantuar, shqiptarët kanë pësuar (si në rastin e Gjorçe Petrovit për shembull), atëherë mund të thuhet me siguri gati të qind për qindtë, se edhe shqiptarët e Kumanovës nuk do të kalojnë më mirë. Edhe më tepër shtohen dyshimet për shkak të fjalorit që është përdorur, ku BDI nuk zotohet se do të kompensohen dëmet, por vetëm se “do të ndihmohet për dëmet”.
“BDI garanton që institucionet e shtetit do të ndihmojnë banorët e Lagjes së Trimave për dëmet materiale”, thuhet në komunikatën e lëshuar pas mbledhjes së kryesisë qendrore të kësaj partie, të mbajtur sot. Në këtë mënyrë BDI po e vazhdon politikën e cila i ka sjellë më së shumti rezultate, sepse sa më tepër ka dëmtuar shqiptarët, aq më shumë vota kanë marrë prej tyre.
Edhe pjesa tjetër e komunikatës së kësaj partie është qesharake dhe tallëse në këto momente kritike për shqiptarët, andaj as që vlen të publikohet. Aq më tepër kur aty nuk sqarohet nëse kryetari i kësaj partie ka ikur nga Maqedonia dhe nëse është kthyer. (Lajm)