Prokurori i ri special vazhdon të mbetet patate e nxehtë në duart e anëtarëve të grupeve të punës për realizmin e Marrëveshjes së Përzhinos.
Pas një nate të lodhshme, sot në orën 11:00 grupet kanë filluar përsëri punën, por si duket kanë nevojë për relaks. Këtë e dëshmojnë edhe filmimet e realizuara nga Tv Era.
Veranda e Klubit të Deputetëve ishte përsëri zyra kryesore e negociatave. Më të lëvizshëm dukeshin Musa Xhaferi, Radmilla Shekerinska dhe Oliver Spasovski, të cilët edhe cingërima e telefonit s’i linte rehat. Dikush kishte nevojë të qëndrojë edhe vetëm!
Nga pamjet e siguruara mungonin vetëm përfaqësuesit e VMRO-DPMNE-së dhe PDSH-së.
Ndërsa, negociatat vazhdonin nën freskinë e shatërvanit, gjelbrimit dhe hijes së pemëve që janë në oborrin e Klubit të Deputetëve, ia arriti edhe ambasadori i BE-së, Aivo Orav, i cili, s’kishte se çfarë të bënte, vetëm se të qëndrojë në këmbë.
Ndërkohë, “treni i fundit” për zgjedhjen e Prokurorit Publik Special është sot. Në qoftë se përfaqësuesit e katër partive më të mëdha në vend e lëshojnë edhe këtë “tren”, atëherë rrezikojnë që shteti të mos ketë mundësi “as në këmbë” t’i afrohet derës së Bashkimit Evropian. /SHENJA/