www.shtegu.com > LAJME > LAJME NGA MAQEDONIA > Gjykata Administrative ia kthen kompetencat Taravarit në fushën e arsimit

Gjykata Administrative ia kthen kompetencat Taravarit në fushën e arsimit

Postuar në 07.08.2019
60 Lexime

Gjykata Administrative hedh poshtë vendimin e Ministrisë së Arsimit dhe Shkencës për marrjen e kompetencave të kreut të komunës së Gostivarit në arsim, në fushën e emërimit dhe shkarkimit të drejtorëve të shkollave të mesme dhe fillore. Sipas vendimit të Administratives, ankesa e komunës së Gostivarit është miratuar, ndërkohë, shpallet i pavlefshëm vendimi i Ministrisë për marrje të kompetencave të kreut të Gostivarit Arben Taravari. Kreu i Gostivarit në reagimin e tij ka theksuar se ky vendim konfirmon marrjen e kompetencave pa kurrfarë të drejte.

Kjo Gjykatë në periudhë të drejtësisë së kufizuar e aprovoi padinë e Komunës kundër Ministrisë së Arsimit dhe Shkencës se në mënyrë të paligjshme kryetarit të komunës së Gostivarit i janë marrë kompetencat në fushën e arsimit. Pra, tash secili nxënës, prind, qytetar, përfshirë këtu edhe militantët partiakë të BDI-së e kuptojnë se ata që morën në qafë arsimimin dhe edukimin e gjeneratave të reja në komunën tonë, kanë emër e mbiemër dhe adresë. Nëse ka pikë morali në vete, Arbër Ademi duhet të kërkoj falje tek nxënësit, prindërit dhe arsimtarët e Gostivarit, dhe të deponojë tek
kryeministri, dorëheqjen e parevokueshme – shkruan në reagimin e Taravarit.

Ministri i Arsimit dhe Shkencës, Arbër Ademi në reagimin e tij në fejsbuk, porosit Taravarin se veprimet e paligjshme dhe shkarkimet e paligjshme të drejtorëve të shkollave, të konstatuara nga Inspektorati i Arsimit dhe Komisioni i shkallës së dytë nuk mund të mbulohen dhe se Taravari si dhe çdokush tjetër e ka të vështirë për ta politizuar dhe partizuar arsimin dhe për të emëruar drejtor madje pa fakultet.

Aktgjykimi i Gjykatës Administrative në asnjë moment nuk thotë se Kryetari i Komunës së Gostivarit ka vepruar në mënyrë të ligjshme. Gjykata ka aprovuar padinë për arsye se disa shkresa kanë munguar, përkatësisht nuk janë dorëzuar në tërësi, e disa të tjera nuk kanë qenë të lexueshme për gjykatën (megjithëse janë dorëzuar të gjitha shkresat në formë të rregullt), andaj nuk kanë mundur ta konstatojnë bazën e aktvendimit për marrjen e kompetencave. Në bazë të këtij vendimi, MASH mund të marrë përsëri vendim të njëjtë apo të parashtrojë ankesë në Gjykatën e Lartë Administrative. Ne u përcaktuam për opsionin e dytë dhe është dorëzuar ankesa me të gjitha shkresat e lëndës dhe se sigurisht se drejtësia duhet të shkoj në vend – ka shkruar Ademi.

Komunës së Gostivarit, deri më tani, dy herë nga nëntë muaj, i janë marrë kompetencat në fushën e arsimit, në pjesën e emërimit dhe shkarkimit të drejtorëve të shkollave fillore dhe të mesme. /Alsat