06.03.2020
Para pak ditësh, në profilin e grupit «Gjuha standarde shqipe» është bërë publike ndihma e grumbulluar e disa anëtarëve të grupit, që i janë dhënë një familjeje në nevojë nga Shqipëria. Konkretisht, anëtarët e grupit Arbëror Bashota, Hysen Mani, J.A., Isuf Ismaili dhe Ilmi Mancaj janë përkujdesur që ta befasojnë me ndihma familjen Kasa në Tiranë. Lekët e grumbulluar, familjes iu dorëzuan nga dy administratorët e grupit: Prof. Flamur Shabani dhe znj. Majlinda Veseli Shehu. Familja në fjalë kishte një shtëpi të vjetër shumëvjeçare, të shkatërruar plotësisht nga tërmeti i 26 nëntorit i vititi të kaluar. Kryefamiljari ka disa vite që ka ndërruar jetë, ndërsa nëna Sinije (me shumë probleme shëndetësore) jeton me të birin, Bledarin 35-vjeçar, të paaftë për të punuar (as nuk dëgjon e as nuk flet). Familja (tashmë e mbetur edhe pa shtëpi) jeton veç me dy pensione: Nëna si pensioniste dhe djali si invalid. Një gjest vërtetë human dhe për t`u përshëndetur, pasi gjuhëtarët po bëjnë një punë grandioze në shpërndarjen e njohurive, pasurimin e gjuhës dhe së fundmi, edhe në grumbullimin e ndihmave për familjet në nevojë, gjë të cilën e dëshmuan edhe gjatë grumbullimit të ndihmave për të prekurit nga tërmeti.