19:46:27 2017-02-23
Një grua me rrezik për vetvrasje nga Maqedonia, mund të qëndrojë për momentin në Gjermani dhe nuk do të dëbohet së shpejti në këtë shtet ballkanik. Një vendim të tillë e ka sjellë Gjykata administrative në Mannheim, me të cilin ajo e ka ndryshuar vendimin e fillimit të muajit shkurt të Gjykatës administrative në Karlsruhe.
Nuk është e mjaftueshme që autoritetet maqedonase të njoftohen përmes e-mailit për rrezikshmërinë e vetvrasjes së gruas, por duhet pranuar një garancë sigurie obligative, thuhet në vendimin e Gjykatës. Ajo mendon se Gjermania e ka për obligim për të shmangur rrezikun eventual dhe jetën e personit që do të dëbohet, thuhet në një komunikatë të Gjykatës të publikuar të mërkurën, përcjellë „Shtegu.com“.
Me këtë rast, autoritetet gjermane i kanë dërguar një shkresë autoriteteve maqedonase përmes e-mailit, por nga një server i shtetit ballkanik ka ardhur vetëm një përgjigje e gjeneruar automatike. Po që se paraqitet rreziku i përkeqësimit të gjendjes së personit gjatë dëbimit, ekziston mundësia e pezullimit të vendimit për dëbim, për shkak të „pamundësisë ligjore“, thuhet më tej në vendim, i cili është i pakontestueshëm.