FC Prishtina e Bernës shënon sukses historik

11:53:25 2016-05-29

Ekipi shqiptar futbollistik FC Prishtina nga Berna e Zvicrës, me një fitore minimale ndaj FC Alle 1:0 që u zhvillua të shtunën në stadiumin Bodenweid, ka shënuar sukses historik në rrugëtimin e saj drejt sukseseve të reja në futbollin zviceran. Me golin e shënuar në minutën 90+1 nga futbollisti Valmir Shala, FC Prishtina edhe praktikisht e ka siguruar inkuadrimin në Ligën e dytë interajonale zvicerane, duke dëshmuar se vetëm me punë dhe angazhim maksimal sukesest nuk mungojnë. Në praninë e mbi 600 shikuesve të flaktë, loja u zhvillua nën presionin se patjetër duhet fituar, ndërsa kualitetin e lojës e pengoi edhe fakti se luhej kundër një kundërshtari që llogaritet si i padenjë për FC Prishtinën.

Por, megjithatë FC Prishtina ia doli në krye, për të kënaqur tifozët e flaktë nga të gjitha trojet shqiptare. Meritë të veçantë për suksesin e tillë padyshim se ka trajneri ambicioz dhe i palodhur i ekipit, Ervin Gashi, i cili për një periudhë kohore dyvjeçare, arriti që klubin ta ngritë për dy rangje më lartë, që nga Liga e tretë, në Ligën e dytë rajonale e deri në Ligën e dytë interajonale. Sukses ky, me të cilin do të krenoheshin edhe klubet më me renome, ndërsa nuk duhet harruar edhe disiplinën dhe angazhimin e gjithë lojtarëve, që janë shndërruar në ambasadorë të vërtetë të diasporës shqiptare, duke përfshirë këtu edhe tifozët e zjarrtë besnikë që nuk hezituan ta përcellin ekipin e tyre të zemrës edhe në viset më të largëta zvicerane. Nuk kanë të ndalur urimet e bashkatdhetarëve për suksesin historik të klubit, ndërsa trajneri Ervin Gashi ka dëshmuar se është Mourinjo i vërtetë, „Number One“ i futbollit shqiptar nga kryeqyteti helvet.