20:23:27 2016-01-16
Një 20 vjeçar nga Kosova, në kampin e refugjatëve në Kaufbeuren të Gjermanisë, e kishte therë një bashkatdhetar të vetin. ndërsa gjykata e ka dënuar me dënim me kusht.
Kosovari 20-vjeçar, i cili e kishte therë me thikë një bashkatdhetar të vetin, e ka lëshuar sallën e gjykatës si person i lirë: Ai është dënuar me dënim me kusht pasi e kishte therë bashkatdhetrin e tij me një thikë, duke i shkaktuar dy plagë, njëra prej të cilave 6,5 centimetra e thellë.
Rasti kishte ndodhur më 19 prill të vitit të kaluar në kampin e refugjatëve në Kaufbeuren. Fillimisht, zënka verbale kishte filluar në mes të dy grupeve, me ç`rast i akuzuari dhe disa persona të tjerë e kishin goditur një kosovar tjetër me grushte në fytyrë, në pjesën e barkut dhe në organet gjenitale. Duke ikur nga shkallët, i sulmuari kishte nxjerrë një thikë dhe kishte goditur njërin nga ta dy herë në mollaqe.
Si duket zënka ishte shkaktuar për një femër dhe nuk përjashtohet mundësia se viktima e kishte provokuar 20-vjeçarin. „Nuk ka dyshim se i akuzuari ka shkaktuar dy të therura me thikë“, ka deklaruar gjykatësi, duke shqiptuar dënimin prej dy vite e gjysmë me kusht, shkruan „Augsburger Allgemeine“, njofton „Shtegu.com“. Me këtë rast, gjykata ka aplikuar të drejtën penale të të rinjve, pasi në fund të këtij muaji i dënuari mbushë 21 vite.
Përderisa prokurori kishte kërkuar dy vite e gjysmë burg, avokati mbrojtës është deklaruar për lirim nga akuza, pasi situata aspak nuk ka qenë e qartë dhe nuk dihet me çfarë thike është realizuar krimi. Vendimi i gjykatës ende nuk ka hyrë në fuqi.