20:10:59 2017-03-08
Dy kosovarë kanë qenë heronj të vërtetë mbrëmjen e së martës në Gjermani. Asaj mbrëmje, në një banesë të një godine nga druri kishte shpërthyer zjarri në njërin nga katet më të lartë, në Heiligenstadt të Thüringenit.
Zjarrin e kishin vërejtur dy kalimtarë kosovarë të moshës 41 dhe 44-vjeçare, të cilët pa hezituar për asnjë çast, ishin futur në flakët e zjarrit, duke nxjerrë nga banesa në flakë një plak të moshës 69-vjeçare, të cilit ia shpëtojnë jetën në momentin e fundit.
Ai është dërguar në një klinikë speciale në Hannover, me djegie të rënda trupore, shkruan „Bild“, njofton „Shtegu.com“. Me këtë rast, shpëtimtarët kosovarë kanë pësuar ngulfatje të lehtë nga tymi.
Shkaku i shpërthimit të zjarrit ende nuk dihet, ndërsa kosovarët me siguri se kanë merituar një medalje për këtë gjest trimëror.