13:51:14 2019-05-30
Filantropja dhe gazetarja e njohur shqiptare Dijana Toska me vendim të Komisionit parlamentar për zgjedhje dhe emërime është zgjedhur anëtare për siguri dhe mbrojtje e Këshillit mbikëqyrës ndaj Agjencisë Tekniko Operative (ATO), mëson gazeta KOHA.
Vendimi për emërimin e Toskës në këtë pozitë më 23 maj ka kaluar në Komisionin parlamentar për zgjedhje dhe emërime, ndërsa i njëjti më 27 maj i është dërguar për ta nënshkruar kryeparlamentarit Talat Xhaferi. Pasi kryeparlamentari ta ketë nënshkruar vendimin, i njëjti menjëherë hyn në fuqi dhe shpallet në gazetën zyrtare.
Përveç Dijana Toskës, për anëtare të Këshillit mbikëqyrës ndaj ATO janë zgjedhur edhe Arjeta Ceka Zhaku nga Tetova, si eksperte e shkencave të informatikës dhe Marija Zllatova Koceva, si eksperte juridike. (koha.mk)