„Të shtunën rreth orës 04.00 të mëngjesit dëgjova të shtëna me armë. Rrugët për në aeroportin e Shkupit ishin të mbyllura. Përsëri filloi lufta në Ballkan“, ka deklaruar një bashkatdhetar për të përditshmen zvicerane frankofone „20 Minutes“. Ai ishte zgjuar gjatë natës, në një rajon i cili gjatë vitit 2001 ishte një teatër i konfliktit midis forcave maqedonase dhe guerilës shqiptare. Më në fund, ky lexues shqiptar kishte arritur të kthehej në Zvicër, pasditen e së shtunës. Të shtënat janë dëgjuar në një periferi të Kumanovës, një qytet rreth 40 km në veri të Shkupit, kanë precizuar burimet policore, shkruan më tej gazeta në fjalë. Operacioni kishte filluar rreth orës 04.30 të mëngjesit, pas informatave që kishte marrë policia se „po vërehen lëvizje të një grupi të armatosur në rajon“, ka deklaruar Ivo Kotevski, zëdhënësi policisë maqedonase. Incidenti ka ndodhur pas aksionit të një grupi të armatosur shqiptarësh më 21 prill, të ardhur nga Kosova, që e kishin pushtuar një stacion të policisë në kufirin e Maqedonisë, duke proklamuar krijimin e një shteti shqiptar në territorin e kësaj republike të ish Jugosllavisë. Në vitin 2001, Marrëveshja e Ohrit i kishte dhëbë fund konfliktit të armatosur gjashtëmujor në mes të forcave të armatosura maqedonase dhe kryengritësve shqiptarë. Marrëveshja parashihte më shumë të drejta për shqiptarët, me shumicë myslimane dhe të cilët përfaqësojnë rreth 25 për qind të Maqedonisë dymilionëshe.
