20:57:33 2016-08-21
Diplomatët shijojnë privilegje të mëdha, në mesin e të cilëve edhe importin pa doganë të artikujve, për nevoja personale. Por, dy irakienë të punësuar në Ambasadën e OKB-së në Gjenevë, si duket e kanë tepruar me tolerancën ndaj tyre, duke sjellë me vete 600.000 pako cigare, të importuara nga Kosova për tregun e zi në Francë.
Në Gjenevë është zbuluar rasti i kontrabandës më të madhe me cigare. Dy irakienë të punësuar në përfaqësinë e OKB-së në Gjenevë, gjatë tre viteve kanë kontrabanduar masovisht cigare, duke iu shmangur tatimeve doganore në vlerë prej rreth 2,4 milionë frangave zvicerane, shkruan „SonntagsZeitung“, njofton „Shtegu.com“. Malli i kontrabanduar është shitur në tregun e zi në Francën Veri-Perëndimore.
Sipas të dyshuarve, cigaret i kanë marrë nga një firmë e Gjermanisë Veriore, e cila ka qenë e specializuar për furnizim të tregtisë së lirë (Duty-Free) nëpër ambasada. Për t`i evituar tatimet doganore, diplomatët irakienë e kanë shfrytëzuar një formular me të cilin kanë dëshmuar se cigaret do t`i përdorin për nevoja personale.
Me të hollat e fituara nga tregu i zi, diplomatët kanë shfrytëzuar mundësinë që të bëjnë një jetë më luksoze. Njëri nga të dyshuarit ka blerë një veturë të llojit „BMW“ si dhe një apartament të shtrenjtë në rrethinën e Gjenevës.
Edhe pse vepra e tyre është vjetëruar, ata janë dënuar me një shumë të hollash prej 170.000, gjegjësisht 120.000 franga.