14:08:10 2016-07-02
Profesori universitar Sevdail Demiri në një prononcim për portalin TetovaSot vlerëson se vrasja e Almir Aliut, katër vjeçarit nga Kumanova si rezultat i një zënke në spitalin e Kumanovës tregon se sistemi i këtushëm shëndetësor është gjenerator i zënkave që krijuan kulmin e një marrëzie.
“Gjithësesi që sistemi i këtushëm i ngarkuar shëndetësor është gjenerator i zënkave të përditshme mes qytetarëve apo edhe personelit shëndetësor. Tragjedia e fundit në Kumanovë është kulmi i kësaj marrëzie.
Prandaj, përgjegjësi të drejtpërdrejtë duhet të ketë edhe ministri i Shëndetësisë, Todorov. Për këtë, urgjentisht duhet shqyrtuar sistemi dhe qasja në procesin e pritjes së pacientëve para dyerve të mjekëve.”, deklaroi Demiri për TetovaSot.
Demiri shtoi se duhet që të kemi kujdes e të mos bëhemi shkaktar për ndonjë eskalim të mundshëm të gjendjes, ku viktimat do të ishin nga radha e të pafajshmëve.
“Rasti i Almirit pa dyshim se na ka tronditur të gjithëve. Sot kur të gjithë duhet të bashkëndjejmë me familjen e tij, duhet të kemi kujdes që mos të bëhemi shkaktar për ndonjë eskalim të mundshëm të gjendjes, ku viktimat prapë do të ishin nga radha e të pafajshmëve. Mos harroni se krimineli nuk ka as komb e as fe”, deklaroi Demiri për TetovaSot. (Tetova Sot)