Për pjesën e dytë të autostradës Shkup-Bllacë, Bashkimi Evropian do të ndajë 26,7 milion euro. Këtë e konfirmoi sot zëvendëskryeministri Bujar Osmani, i cili tha se 20% i fondeve të pakthyeshme janë siguruar nga Korniza për Investime në Ballkanin Perëndimorë. Si koordinator për zbatimin e këtij projekti, Osmani tha se mjetet tjera për segmentin e dytë prej 10,5 km do të merret kredi nga Banka Evropiane për Zhvillim-BERZH.
Do ta konfirmojnë të premten, ku ne do të jemi atje në Poloni që 26,7 milion euro si grant-mjete të pakthyeshme nga kjo kornizë do t’i dedikohen Maqedonisë së Veriut për ndërtimin e këtij projekti. Kjo do të na ndihmojë shumë në rrumbullakësimin e konstruksionit të përgjithshëm financiar. Tani kjo i bie si ko-financim i rëndësishëm, pothuajse 20% të fondit, pjesa tjetër do të jetë kredi nga BERZH-i.”- theksoi Bujar Osmani, zëvendëskryeministër.
Për 12,5 kilometra të autostradës Shkup-Bllacë që do të kushtoj 120 milion euro, nga buxheti i shtetit fillimisht do të ndahen vetëm 4,2% para të gatshme. Zëvendëskryeministri Osmani tha se këto 5 milion euro janë për pjesën e parë të autostradës prej 2 km, për të cilën u zotua se javës së ardhshme pritet të shpallet tenderi. Ndonëse u paralajmërua në pranverë, segmenti i parë që lidh Maqedoninë e Veriut me Kosovën pritet të fillojë të ndërtohen gjatë vjeshtës dhe sipas projektit punimet do të zgjasin 18 muaj. Siç u tha nga Ministria e Transportit tenderi nuk u shpall në muajin shkurt për arsye se në terren u paraqitën pengesat me zonën ekonomike të Vizbeg-ut dhe varrezat e vendosura përskaj rrugës. Pjesa e dytë deri në Shkup, pritet të fillojë ndërtimi vitin e ardhshëm dhe të zgjasë rreth 36 muaj, ndërsa autostrada e re e cila do të ketë katër tunele dhe tetë ura, pritet të vihet në përdorim në vitin 2023. Ndërkaq Kosova, nga pjesa tjetër e kufirit deri në Prishtinë për më pak se pesë vjet përfundoi ndërtimin e autostradës “Arbën Xhaferi” me gjatësi prej 55 kilometra, e cila kushtoi 600 milionë euro. /Alsat/