Ballkanasi e pushon nga puna policin zviceran

Një polic zviceran nuk e ka denoncuar rastin e një hajni të dyshuar. Gjykata tashmë e ka dënuar për favorizim të plaçkitjes. Shuma e plaäkitjes është jo më shumë se 26.60 franga zvicerane, ndërsa i dënuari është pushuar nga puna
Pasdite e së premtes, në një shitore në stacionin e trenit në Bernë. Një çift ka tentuar që të fshehë mall të shitores, duke mos e paraqitur në arkë. Por, detektivët arrijnë t`i hetojnë dhe ta alarmojnë policinë. Në shportën e tyre gjenden gjëra ushqimore në një vlerë prej 26.60 frangave zvicerane, për të cilat nuk kanë paguar.
Kryerësja e veprës jeton në Bernë, ndërsa kryerësi jeton në Ballkan, shkruan e përditshmja zvicerane „Berner Zeitung“. Ai ka ardhur në Zvicër vetëm për vizitë. Shefi i shitores dëshiron të ngritë kallëzim penal për çiftin, ndërsa njëri nga policët i sqaron se gjasat për konsekuenca dënimi për këtë rast janë minimale në krahasim me përgatitjen e kallëzimit penal, i cili do të kushtonte më shtrenjtë.
Me këmbëngulje, shefi dëshiron të padisë që të dy krerësit e veprës, ndërsa për ta përfunduar rastin sa më shpejtë, policët vendosin që të bëjnë një kallëzim penal vetëm për banoren e Bernës.
Rasti kishte ndodhur një vit e gjysmë më parë, ndërsa polici që nuk e ngriti kallëzimin e dytë penal, nga dita e enjte nuk është më në punë. Ai është dënuar nga gjykata, për shkak të keqpërdorimit të detyrës zyrtare me vetëdije.
Avokati i policit ka reaguar ashpër: „Ende nuk kam përjetuar një gjë të tillë. Ai nuk e ka njohur asnjërin nga hajnat, ai nuk ka përfituar asgjë nga ky rast dhe sipas mendimit tim, ai është dashur të lirohet nga akuza“. Se a do të bëjë ankesë për këtë rast, mbetet të shihet në vazhdim.