Aktori dhe fituesi i çmimit Oscar, Matthew McConaughey, do ta provojë veten në një profesion të ri si profesor në universitetin prestigjioz të Texasit.
Revista “Time” shkruan se McConaugheyt iu dha mundësia ta provonte veten si profesor në fakultetin prestigjioz në Texas, shkruan KOHA Ditore. Fakulteti e konfirmoi lajmin dhe tha se këtë vjeshtë, në stafin e mësimdhënësve të vitit të ri studentor do të bashkohet edhe një bashkëqytetar i vlerësuar.
Aktori i popullarizuar ka qenë një kontribues i jashtëm dhe pedagog i ftuar në kampusin e Austinit për disa vjet tani, ndërsa bashkëpunëtorët e përshkruajnë atë si një mësues dhe mentor të shkëlqyer.
McConaughey do të ligjërojë për artet filmike, shkrimin e skenarëve ndërkohë që raportohet se tashmë e ka hartuar planprogramin mësimor.
Nga ky universitet theksojnë se e vlerësojnë shumë aktorin për aftësinë dhe gatishmërinë e tij për të punuar jashtë auditorit.
Matthew e ka studiuar komunikimin në Universitetin e Texasit në Austin.