Aksidenti që një 28 vjeçar kosovar kishte shkaktuar në prill të vitit 2018 në Unterentfelden të Zvicrës, ka gjetur vazhdimin e tij gjyqësor gjatë kësaj jave. Faktet ishin të padiskutueshme – Gjykata e konsideroi të arsyeshëm dënimin e kërkuar.
Aksidenti ishte spektakolar: më 10 Prill 2018, rreth orës 03:00, një kosovar, atëbotë 28-vjeçar në rrugën Badstrasse, në Unterentfelden humbi kontrollin e tij mbi veturën e kuqe të tij VW Polo GTI. Ajo doli nga rruga duke u futur në trotuar, duke rrënuar pjesën e përparme, e më pas u përplas për fasadën e një ndërtese në Eichenweg 14.
Gjatë kësaj, ajo përfshiu edhe një VW Golf të parkuar të bardhë. Ai u lëviz nga vendi duke u përplasur me një VW Polo blu të parkuar. Makinat u dëmtuan për të paktën me 16,000 franga, ndërsa dëmi tjetër ishte 12,000 franga. Shoferi dhe një nga dy pasagjerët u lënduan lehtë.
Epilogu gjyqësor u soll gjatë kësaj jave në Gjykatën e rrethit Aarau, pas procedurës së shkurtuar, pasi faktet ishin të padiskutueshme, informon Shtegu.com.
Zyra e prokurorit publik akuzoi kosovarin për tre vepra penale: një shkelje të rëndë të rregullave të trafikut, drejtimin e një automjeti motorik në gjendje të dehur dhe drejtimin e një automjeti motorik në një gjendje të paaftë.
E gjitha kjo pasi që vozitësi i Polos, i ardhur nga Waldhaus, duhet të ketë qenë duke qarkulluar me së paku 88 km/orë në zonën ku shpejtësia maksimale e lejuar ka qenë 30, sepse përqendrimi i alkoolit në gjak i shoferit ishte 0.97 promilë dhe sepse një natë më herët ai kishte fjetur vetëm katër orë.
Akuza e prokurorisë përbëhej kryesisht nga një dënim me kusht prej 15 muajsh burg për një periudhë prove katërvjeçare dhe gjobë 9,000 franga. Gjykata e përgjithshme e kryesuar nga kryetari i gjykatës, Andreas Schöb, deklaroi se të gjitha kushtet ishin përmbushur për procedurën e shkurtuar dhe se dënimi i kërkuar ishte i përshtatshëm.
Në këtë kuptim, gjykata mbështeti kërkesën e prokurorit për aktvendim. Përveç dënimit, i akuzuari gjithashtu duhet të paguajë shpenzimet e procedurës dhe shpenzimet e palës së tij. Vetëm kostot e hetimit arrijnë në më shumë se 10,000 franga.