16:03:00 2019-06-02
Në kilometrin e 140-të autorrugës A3 Bregana-Lipovac, në mes të nyjes Okuçani dhe nyjes Novska në drejtim të Breganes në Kroaci, pasditen e hershme të së dielës është shkaktuar një aksident i rëndë në mes të një autobusi dhe kamioni.
Sipas informatave të para, një person e ka humbur jetën (vozitësi i kamionit), ndërsa dhjetëra të tjerë nga autobusi me autotarga të Bosnjë e Hercegovinës, janë lënduar. Në vendngjarje kanë dalë ekipet e shpëtimit, shkruajnë mediat kroate, përcjell Shtegu.com.
Sipas portalit „Info Bijeljina“, pronari i autobusit është nga Bijelina, i cili ka qarkulluar në realcionin Bijelinë-Frankfurt. Sipas portalit „24sata“, vozitësi i kamionit është shtetas i Maqedonisë së Veriut.
Udhëtarët kanë rrëfyer se autobusi i tyre ishte ndalur për shkak të një aksidenti tjetër rreth njëqind metra më larg dhe në momentin që kishte filluar të lëviz ngadalë, në te është përplasur kamioni, vozitësi i të cilit e ka humbur jetën në vendngjarje.
Sipas dëshmive të udhëtarëve, përplasja ka qenë e fuqishme dhe në autobus është shkaktuar panik. Ende nuk ka informata lidhur me gjendjen shëndetësore të dhjetëra të plagosurve që janë dërguar në spital.