12:20:07 2017-10-24
Gjatë fundjavës në aeroportin e Düsseldorfit është arrestuar një shtetas 46-vjeçar kosovar, i cili ka qenë i kërkuar me fletarrest ndërkombëtar nga autoritetet holandeze.
Krimineli i kërkuar ka udhëtuar nga Prishtina dhe në pikën kufitare është identifikuar me pasaportën e vet kosovare. Pas kontrollimit të të dhënave, Policia federale gjermane ka konstatuar se kosovari ka qenë i kërkuar për vepra të ndryshme kriminale, shkruajnë mediet gjermane, përcjellë „Shtegu.com“. Ai ka qenë i dënuar me tetë vite burg për shkak të pjesëmarrjes në trafikim të qenieve njerëzore, shantazhit dhe pengmarrjes.
Gjithashtu në tre raste ai ka marrë peng femra, i ka detyruar në prostitucion dhe i ka shantazhuar. Në vitin 2005 është arratisur nga burgu dhe tashmë do të duhet të vuajë dënimin e mbetur prej 1.104 ditëve burgim në Holandë. Së shpejti pritet që kosovari të ekstradohet në Holandë. (Shtegu.com)