Viktima Perica G.
20:26:34 2017-09-15
Kosovari 38-vjeçar, më datë 19 gusht të këtij viti, rreth orës 4.30, në lokacionin në mes të rrugëve „Ottakringer Strasse/Kalvarienberggasse“ ka therë me thikë dy persona pasi i kishin dhënë „kompliment“ përcjellëses së tij. Gruaja në fjalë ka deklaruar se përcjellësin e ka njohur vetëm nga shikimi, i cili atë natë ka qenë në një klub në „Ottakringer Strasse“.
I dyshuari për vrasje, edhe përkundër refuzimit të afrimit, e ka përcjellur gruan rrugës për në shtëpi. Viktima 37-vjeçare, një pronar lokali dyshohet t`i ketë thënë: „Çmenduri, në këtë kohë një grua kaq e bukur të ecë nëpër rrugë“. Me këtë rast, shoqëruesi i gruas 36-vjeçare nxjerrë një thikë dhe i therë dy personat. Që të dy personat e sulmuar, një shtetas serb dhe një boshnjak, bien përtokë duke pësuar lëndime të rënda.
Pas një operacioni urgjent, serbi 37-vjeçar nuk arriti tu mbijetojë plagëve të marra, ndërsa boshnjaku i plagosur rëndë mbijetoi.
Që atëherë, sulmuesi i dyshuar ishte në arrati, ndërsa ndaj tij kishte urdhërarrest ndërkombëtar. Të mërkurën, më 13 shtator, i dyshuari është arrestuar në aeroportin Wien-Schwechat, rreth orës 14.30, shkruan „Heute“, përcjellë „Shtegu.com“. Kosovari i dyshuar ishte kthyer në Austri me një avion nga Prishtina.
Përmes një informate, policia austriake i kishte rënë në gjurmë duke e arrestuar me ndihmën edhe të njësitit special të Vjenës. „Ai tashmë është në paraburgim në Josefstadt“, ka deklaruar zëdhënësi i policisë, Harald Sörös.