19:47:41 2017-09-15
Pas një dështimi të përpjekjes për të flirtuar nga vetura në veturë, në autostradën gjermane BAB 215, në mes të Kielit dhe Neumünsterit, në Gjermani, një shqiptar e ka humbur patentën e shoferit. Që nga rrethina e Kielit, më datë 10 shtator të këtij viti, në orët e hershme të mëngjesit, shtetasi 34-vjeçar nga Shqipëria ka tentuar të flirtojë nga vetura e tij Audi A 8, me një gjermane 27-vjeçare, përmes gjestikulimeve, duke ia kërkuar numrin e telefonit. Por, ajo nuk ka reaguar fare, duke vozitur më tej.
Në autostradën BAB 215, shqiptari i del përpara gjermanes së re, në mënyrë që ajo është dashur ta ngadalsojë shpejtësinë në 60 Km/h, duke frenuar herë pas here. Në momentin që ajo ka tentuar ta tejkalojë, shqiptari e ngritë shpejtësinë, duke i qëndruar para dhe duke ia kërkuar numrin e telefonit përmes gjestikulimit, shkruajnë mediet gjermane, njofton „Shtegu.com“. Këtë veprim ai e përsëriti disa herë, përgjatë shumë kilometrave.
Në afërsi të lokacionit Blumenthal, gjermanes iu mbushë kupa dhe menjëherë e alarmoi policinë. Në ora 06.50, policia gjermane e ndaloi shqiptarin në lokacionin Neumünster Nord, duke e kontrolluar në detaje. Me këtë rast, ata konstatuan se shqiptari ka qenë në gjendje të dehur, me sasi prej 1,11 promila alkool në gjak. Ky ishte edhe përfundimi i udhëtimit të tij, pasi ndaj tij është urdhëruar testimi i gjakut, ndërsa i është konfiskuar edhe patenta e shoferit.