19:45:34 2017-08-04
Dhjetë minuta pas nisjes, një avion i vogël zviceran është rrëzuar. Tre persona e humbën jetën, ndërsa një i mitur është në gjendje të rëndë.
Pas rrëzimit të një avioni të vogël në afërsi të Diavolezza te Pontresina në Kantonin e Graubundenit, tre persona e kanë humbur jetën: piloti i avionit dhe dy të rinj 14-vjeçar, nga një kamp të rinjsh. Një shtatëmbëdhjetëvjeçar është lënduar rëndë.
Këtë lajm e ka konfirmuar policia zvicerane gjatë të premtes, në një konferencë për shtyp në Samedan, përcjellë „Shtegu.com“. I lënduari është dërguar me helikopter në spitalin e Churit. Avioni i vogël i llojit „Piper PA-28“ është rrëzuar rreth orës 09.30, ndërsa ekipet e shpëtimit kanë hasur në një fluturake tërësisht të shkatërruar.
Avioni ka qenë duke fluturuar në kuadër të një kampi të rinjsh, që tradicionalisht mbahet çdo vit në Engadin. Që nga 30 korriku, nga ky kamp kanë fluturuar 192 të rinj.
Për pjesëmarrësit e këtij kampi është organizuar një ekip përkujdesës në rast të krizave. Të gjitha viktimat janë shtetas zvicerane, ndërsa ende nuk dihet shkaku i rrëzimit të avionit.