Xherdan Shaqiri shpall tërheqjen e tij nga Kombëtarja Zvicerane

Bubullimë nga qielli i kthjellët për Kombëtaren Zvicerane! Xherdan Shaqiri ka bërë të ditur në rrjetet e tij sociale se nuk do ta bartë më fanellën e ekipit zviceran

Euro 2024 do të jetë gara e fundit ndërkombëtare e Xherdan Shaqirit me fanellën e ekipit zviceran. Lojtari shqiptar i Bazelit ka njoftuar në rrjetet e tij sociale se po i jep fund karrierës, pas 125 paraqitjeve.

“Shtatë turne, shumë gola, 14 vite me ekipin zviceran dhe momente të paharrueshme”, ka shkruar “XS” në llogarinë e tij në Instagram, transmeton portali Shtegu. “Është koha për t’i thënë lamtumirë kombëtares. Mbeten kujtimet e mrekullueshme dhe për të gjithë ju: DANKE, MERCI, GRAZIE, FALEMINDERIT”.

Në karrierën e tij, lojtari i Bazelit e ka veshur 125 herë fanellën e kombëtares, gjë që e bën atë lojtarin e dytë më të përzgjedhur në historinë e Kombëtares Zvicerane, pas Granit Xhakës (130). Që nga paraqitja e tij e parë më 3 mars 2010 kundër Uruguait, Shaqiri ka shënuar gjithashtu 32 gola me fanellën e kryqit të bardhë. Disa prej të cilave janë të jashtëzakonshme. Mund të përmendim hat-trickun e tij kundër Hondurasit në 2014, rikthimin e tij kundër Polonisë në 2016, garën e tij solo kundër Serbisë në 2018 ose, së fundmi, golin e tij kundër Skocisë gjatë këtij Euro.

Është një faqe që po kthen në historinë e skuadrës zvicerane: ajo e një lojtari që ka ditur gjithmonë të rrisë nivelin e lojës kur është e nevojshme, shkruan gazeta „Blick“. Ai është gjithashtu lojtari i vetëm europian që ka shënuar gol në gjashtë turnetë e fundit të mëdhenj.