Pothuajse katër vite ka zgjatur kontesti juridik, për miratimin e lejes për ndërtimin e një qendre islamike në Wil të Zvicrës. Që nga fundi i muajit qershor, punimet kanë filluar, ndërsa gazeta „Tagblatt“ i ka bërë një vizitë punimeve në kantier. Aty, punimet janë duke u zhvilluar me një intensitet të shpejtë e preciz, pasi kjo ndërtesë e shenjtë kërkon norma të caktuara që falja të mund të bëhet në mënyrë të rregullt. Projekti në fjalë ka një rëndësi të veçantë edhe për Zulbear Zejnelin. Nëpunësi i lartë i firmës „Mahler AG“, Niederuzwil, njëherit është edhe anëtar i Bashkësisë islame në Wil, e cila edhe ka inicuar fillimin e ndërtimit të xhamisë. „Për mua, ndërtimi i këtij objekti është i lidhur edhe me shumë emocione“, ka pohuar ai, njofton „Shtegu.com“.
Zulbear Zejneli për çdo ditë është në vendin e ngjarjes dhe është duke i koordinuar punimet, ndërsa çdo të dytën ditë atij i bashkohet edhe imami shqiptar nga Shkupi, Bekim Alimi. „Këtu kemi të bëjmë me një kantier ndërkombëtar e ndërkonfesional. Deri më tani na kanë ndihmuar vullnetarisht shumë persona me kombësi dhe religjione të ndryshme, psh një katolik shqiptar. Shpeshëherë, anëtarët e bashkësisë islame sjellin ushqime dhe pije“, spjegon Zulbear Zejneli.
Përndryshe, Bekim Alimi është nga Maqedonia, në Shkup ka kryer shkollën e mesme teologjike-islame, ndërsa në Kajro ka studiuar shkencën e teologjisë dhe filozofisë. Me familjen e tij, ai është duke jetuar në Zvicër që nga viti 1998. Përpos obligimeve të tij si imam, ai është duke punuar edhe në Grupin punues për çështje integrimi si përkthyes nga gjermanishtja-arabishjta dhe gjuha shqipe.
Kur para katër vitesh, bashkësia islame parashtroi kërkesën për ndërtimin e qendrës islamike, nuk u pranua edhe me aq dashuri nga banorët lokalë të cilët parashtruan rreth 300 ankesa. Por këshilli komunal i qytetit, i refuzoi të gjithë, ndërsa rasti u transferua në Gjykatën administrative.
Kundërshtarët e projektit, ndër të tjera kishin argumentuar ankesat e tyre me arsyen se ndërtimi i projektit do të ngarkonte komunikacionin rrugor. Gjykata administrative e kishte përkrahur vendimin e instancës së parë, ndërsa ankuesit e kishin procesuar lëndën deri te Gjykata federale, e cila kishte dhënë dritën e gjelbër për ndërtimin e objektit.
Me kalimin e kohës, edhe bindjet e banorëve kanë filluar të ndryshojnë. Kështu për shembull, Zejneli dhe Alimi rrëfejnë se si ata kanë qenë të ftuar nga një fqinje, e cila u ka ofruar kafe dhe imami i është përgjigjur rreth pyetjeve të parashtruara rreth islamit.
Për momentin është duke u ndërtuar garazhi nëntokësor, ndërsa punimet parashihen të kryhen për pesa-gjashtë muaj, po që se edhe koha qëndron aleat i tyre. „Deri atëherë besoj se të gjitha punët do të shkojnë si është më së miri dhe shpresoj, pa ndonjë aksident“, ka përfunduar Zulbear Zejneli.