Tragjedi në Apple të Zvicrës, gjenden tre kufoma të një familje belge

17:04:28                    2019-06-18

Në Apple të Kantonit Vaud në Zvicër, ka ndodhur një dramë e rëndë familjare: Një patrullë e policisë ka zbuluar tre persona të vdekur: Një burrë, një grua dhe një djalë 13-vjeçar.

Të hënën, një patrullë policore në Apple VD zbuloi tre persona të vdekur. Tashmë është nisur një hetim për të përcaktuar rrethanat e sakta të kësaj tragjedie. „Hetimi vazhdon akoma, nuk mund të themi asgjë për shkakun e vdekjes“, thotë Cédric Pittet, zëdhënës i Policisë Kantonale të Vaud-it, me kërkesë të „Blick“, informon Shtegu.com.

Një banor kishte alarmuar shërbimet e emergjencës rreth orës 21:45, sepse ai nuk kishte vënë re ndonjë lëvizje në shtëpinë fqinje për disa ditë, thuhet në një deklaratë nga policia.

Me të arritur në shtëpinë në fjalë, oficerët zbuluan trupat e pajetë të një burri dhe një gruaje, si dhe një djali 13-vjeçar. Të vdekurit dyshohet se janë shtetas belg. Policia supozon se bëhet fjalë për një dramë familjare. „Krimi duhet të ketë ndodhur disa ditë para zbulimit, ndoshta javën e kaluar. Megjithatë, ne nuk kemi qenë në gjendje të përcaktojmë ende kohën e saktë“, ka saktësuar Pittet. Deri më tani, nuk ka indikacione për përdorimin të forcës së armatosur.