15:16:00 2017-01-07
Sipas një komunikate të policisë zvicerane në Gjenevë, të mërkurën e kaluar ëshë arrestuar një trafikant i dyshuar shqiptar i lëndëve narkotike, i cili gjithashtu ka thyer Ligjin për të huajt.
Një patrullë policore ka vërejtur tre toksikomanë në stacionin e autobusëve „Les Esserts“, në Gjenevë. Treshja e kishte takuar trafikantin e vet, i cili pasi ishte hetuar nga një agjent i policisë, kishte marrë arratinë, duke e shtyrë agjentin në kaçuba.
Të nesërmen, policia e kishte njohur të arratisurin i cili ka qenë duke qëndruar në stacionin „Balexert“. Trafikanti shqiptar i kishte ofruar dy pako të heroinit një polici civil duke mos e ditur se për çka bëhej fjalë. Policia intervenon për ta arrestuar, por shqiptari u kundërvihet në mënyrë të egër, duke i sulmuar me grushte, shqelma dhe goditje ta tjera, shkruan „20 Minutes“, njofton „Shtegu.com“. Rezultati përfundimtar: Tre policë zviceranë të lënduar në këmbë, fytyrë. bark dhe shpatulla.
Trafikanti shqiptar, i cili me vete kishte edhe pesë pako të tjera me lëndë narkotike, i është dorëzuar Prokurorisë. Një qen policor ka gjetur edhe 26,7 gramë të heroinit të fshehur.