Pasditen e së premtes, 43 të burgosur të burgut Champ-Dollon në Zvicër, pas shëtitjes përkohësisht refuzuan të ktheheshin në qelitë e tyre, informon Agjencia zvicerane e lajmeve SDA.
Kryengritje në burgun Champ-Dollon në afërsi të Gjenevës: 43 të burgosur protestuan të premten pasdite kundër masave të ndërmarra në lidhje me koronavirusin. Ata përkohësisht refuzuan të kthehen në qelitë e tyre.
Disa të burgosur madje bënë thirrje për lirimin e tyre të parakohshëm nga burgu përballë pandemisë, siç ishte e mundur në vende të tjera si Franca, sipas Laurent Forestier, zëdhënësit të autoritetee të burgut, në një deklaratë për portalin online „20 Minutes“. Sidoqoftë, kërkesat ishin kontradiktore dhe jo shumë të qarta.
Ato janë gjithashtu një shenjë zhgënjimi për masat e ndërmarra përderisa po përhapet koronavirusi, transmeton Shtegu.com. Për shembull, punëtoritë duhet të mbyllen ose të ndërpriten aktivitetet e përditshme. Kjo ka ndikuar në jetën e përditshme të të burgosurve. Sidoqoftë, opsionet e vizitës nuk janë të kufizuara, pasi janë vendosur panele pleksiglas.
Protesta kaloi pa ndonjë eksces. Mes të burgosurve të tjerë situata mbeti e qetë – në këtë burg janë të vendosur gjithsej 550 të burgosur. Rreth orës 22:20 në mbrëmje, protestuesit u kthyen vullnetarisht në qelitë e tyre.