Shaqiri merr karton të kuq nga Zvicra për selfie

Ylli shqiptar i futbollit zviceran, Xherdan Shaqiri është përkujdesur që të krijojë reagime të pakëndshme me një autoincizim me celularin e tij. Nga tifozët e tij ai pranoi njëzet mijë pëlqime, por nga Organizata zvicerane „RoadCross Schweiz“ e cila angazhohet për viktimat në komunikacion, ai ka marrë një karton të kuq.

Yllit njëzetekatërvjeçar, Xherdan Shaqiri nuk u hamendë shumë për të publikuar në instagram një vidoe dhjetësekondëshe që e kishte incizuar personalisht duke drejtuar veturën. Në rrjetet sociale atë e përcollën rreth 840.000 përkrahës nga e gjithë bota, informon „Schweiz am Sonntag“, njofton „Shtegu.com“.

Në prapaskenë të klipit mund të dëgjohet rap muzikë, ndërsa Shaqiri bën grimasa duke shikuar rregullisht në kamerën e celularit, të cilin e mban në dorën e djathtë. Një herë ai e bën edhe shenjën e paqes me dorën e majtë. „Reagojmë me moskuptim për videon e zotëri Shaqirit“, ka deklaruar zëdhënësja e RoadCross, Patrizia Koller për „Schweiz am Sonntag“. „Gjatë vozitjes, të dy duart duhet të qëndrojnë mbi timon dhe shikimi të jetë në rrugë“. Në parim, gjithnjë vlen: „Në timon larg celulari“.

Mënjanimi i shikimit nga rruga, shpeshëherë është shkaku kryesor për fatkeqësi në komunikacion dhe gjatë vitit 2014 ka qenë shkaktar i më tepër se një mijë aksidenteve me lëndime të rënda trupore. Për këtë, shkrimi dhe leximi i mesazheve, telefonimi me celular në vesh, si dhe përdorimi i kamerës duhet të shmangen, këshillon Koller.

Shaqiri menjëherë ka reaguar ndaj kritikës, duke e larguar menjëherë nga instagrami videon e postuar. Deri më tani, Shaqiri asnjëherë nuk ka qenë i dënuar për përdorim të palejuar të telefonit gjatë vozitjes.