12:36:06 2019-03-18
Në qytetin universitar holandez të Utrehtit, disa persona janë plagosur me armë zjarri. Sipas një radio holandeze, të paktën tre persona janë vrarë, raportojnë mediat botërore, përcjell Shtegu.com. Policia dyshon se sulmi mund të ketë një sfond terrorist.
Të shtënat u dëgjuan rreth 10:45, në një tramvaj në perëndim të qytetit. Forcat antiterroriste janë në vendngjarje, njoftoi gazeta „AD“, përcjell Shtegu.com.
Të paktën një sulmues është arratisur. Është e mundur që disa persona kanë qëlluar, njoftojnë mediat. Në kërkim është një veturë e kuqe, e vogël.
Stacioni RTV Utrecht ka cituar një dëshmitar, i cili ka pohuar se shumë persona kanë ikur nga vendngjarja, ndërsa e ka parë një grua të shtrirë në dysheme.
Deri më tani janë angazhuar tre helikopterë shpëtimi për të transportuar të plagosurit nëpër spitale.
Përmes Twitter-it, policia holandeze ka apeluar që të mos pengohen ndihmësit në kryrerjen e punës së tyre. „Mbajini rrugët të hapura për ta“.
Kryeministri holandez Mark Rutte shprehu shqetësim duke thënë se situata është „brengosëse“.
Policia tha se është në kërkim të një 37-vjeçari turk, i identifikuar si Gokmen Tanis, dhe i paralajmëroi qytetarët që të qëndrojnë larg tij.
Utrechti ndodhet rreth 50 kilometra në juglindje të Amsterdamit.