Refugjati irakien shpëton dy pilotë gjermanë

18:05:15            2016-03-10

Në Osnabrück të Gjermanisë, në hapësirat e një qendreje strehimore është rrëzuar një avion i vogël privat. Një veteriner nga Iraku vrapoi menjëherë në vendin e aksidentit duke shpëtuar pilotin dhe ndihmësin e tij.

Një veteriner irakien ua ka shpëtuar jetën dy pilotëve të një avioni privat të rrëzuar gjatë të enjtes. Refugjati irakien 34-vjeçar i kishte liruar nga rrënojat e avionit të rrëzuar dy pilotët e lënduar rëndë, duke iu dhënë ndihëm e parë mjekësore, thuhet në një komunikatë të policisë gjermane, të cilën e transmeton „Welt“, njofton „Shtegu.com“.

„Reagimi i tij i shpejtë ka qenë shembullor“, ka deklaruar një zëdhënës i policisë gjermane. „Me këtë, ai ua ka shpëtuar jetën pilotit dhe ndihmësit të tij, duke i liruar nga rrënojat e avionit nga i cili rrezikohej prej lëndëve djegëse“.

Gjatë aksidentit, është shkaktuar rreziku i një zjarri, bile ndoshta edhe i eksplodimit të avionit. Dy persona të tjerë kishin kaluar me lëndime më të lehta, ndërsa ambulanca i kishte dërguar të katër të lënduarit në një siptal të afërt.

Irakieni Hassanien Salman, për momentin është duke banuar në qendrën strehimore për refugjatë në hapësirat e një kazerme ushtarake. Mu në këtë hapësirë, avioni i llojit „Piper 34 T“ ishte rrëzuar për shkaqe ende të panjohura, ndërsa piloti 35-vjeçar njihet si pilot me përvojë.

Salman i ka rrëfyer gazetës gjermane „Neuen Osnabrücker Zeitung“ (NOZ), se ai kishte qenë duke u pastruar, kur e kishte dëgjuar përplasjen e zhurmshme, sikur të ishin përplasur dy trena.

Së bashku me një banues të qendrës strehimore, ai e kishte fikur zjarrin në avion, duke i liruar më pas të lënduarit nga rrënojat. Edhe pse është vetëm një veteriner, ai ka mundur t`i dallojë lëndimet e rënda në kokë të viktimave, duke iu dhënë ndihëm e parë. Ai nuk ka dashur ndonjë mirënjohje, pasi: „E kam bërë vetëm ate, që secili nga ne duhet ta bëjë“, ka përfunduar në gjuhën angleze refugjati irakien.