Me ndihmën e një qeni policor, në një bodrum në Pfäffikon të Zvicrës, është arrestuar një hajn i dyshuar për plaçkitjen e verërave të shtrenjta. Qeni e kishte hetuar kosovarin 49-vjeçar, të dehur në masë të madhe dhe pas një kohe të shkurtër, policia e arreston në vend të ngjarjes, shkruan e përditshmja zvicerane „NZZ“. Brenda një muaji, ai kishte hyrë tri herë në bodrum, duke marrë me vete verëra në vlerë prej disa mijëra frangave zvicerane, thuhet në një kumtesë të policisë zvicerane, të lëshuar gjatë të mërkurës. Në të njëjtën kohë, ai edhe ka shkaktuar dëme në një vlerë prej disa mijëra frangash. Hetimet e mëtutjeshme kanë dëshmuar se ai ka qenë i kërkuar edhe nga kantonet tjera për të vujatur dënim me burg.