Policia zvicerane gjobit nëntë kurreshtarë të aksidentit në komunikacion

14:11:02                     2019-05-26

Policia Kantonale e St. Gallenit në Zvicër, për herë të parë ka realizuar një kontroll kundër kurreshtarëve në trafik. Për këtë qëllim, ajo ka përdorur një ushtrim interkantonal nga departamenti i zjarrit në autostradën A13 Rhenital të St. Gallenit. Për dy ditë me radhë është inskenuar një aksident serioz pak para daljes së autostradës Schaan për në Buchs.

Gjithsej, janë hetuar nëntë vozitës të automjeteve, të cilët po filmonin ose fotografonin „aksidentin“ gjatë vozitjes.

Këta kurreshtarë në komunikacion janë denoncuar në prokurori. Ata do të përballen me gjoba prej disa qindra frangash dhe ndoshta edhe me tërheqjen e patentë shoferit.

Zëdhënësi i policisë së Kantonit të St. Gallenit, për „SRF“ ka deklaruar se kurreshtarët gjithnjë e më shumë po bien në sy gjatë aksidenteve, informon Shtegu.com. Bile edhe nga korsitë e kundërta të autostradës, kurreshtarët e ngadalësojnë vozitjen sa për të bërë ndonjë fotografi apo edhe për të incizuar. Kjo çon në situata të tjera të rrezikshme.

Aksidenti i inskenuar, për herë të parë ka ofruar mundësinë që problemi të shqyrtohet më seriozisht. Policia nuk ka qenë e përfshirë drejtpërdrejt në stërvitjen gjatë aksidentit, prandaj ka mundur të fokusohet në kurreshtarët, thotë zëdhënësi i medias Florian Schneider. Megjithatë, policia e Kantonit St. Gallenit nuk planifikon të kryejë kontrolle të mëtejshme të kurreshtarëve. Por, ajo do të vazhdojë të mbajë njërin sy hapur nga kurreshtarët, aty ku është e mundur.