Eltioni, Diartnisi dhe Eduardi (radha e parë, nga e majta) janë duke vijuar shkollimin që nga vera në Ellerbäke. Shokët e tyre janë mobilizuar që ata të mund të qëndrojnë në Gjermani
21:55:45 2016-02-13
Fjalën „dëbim“, nxënësit gjermanë të shkollës së mesme në Bookholzberg të Gjermanisë, më parë e kishin dëgjuar vetëm përmes televizorit. Por, tashmë është bërë realitet. Tre shokët e tyre të klasës, refugjatë nga Kosova, është dashur të dëbohen mëngjesin e së mërkurës. Pasi avioni në aeroportin e Hannoverit ka qenë i stërmbushur, familjes i është prolonguar afati edhe për disa javë. Këtë periudhë, shokët e klasës duan ta shfrytëzojnë: Ata janë mobilizuar që Eltioni, Diartnisi, Eduardi dhe familja e tyre të mund të qëndrojnë në Komunën Ganderkesee.
Në një konferencë për shtyp të cilën e kanë organizuar shokët e tyre, Eduardi 15-vjeçar ka rrëfyer për ngjarjen: Rreth orës 06.30 dikush trokiti në derë. Dy policë në uniformë dhe dy persona civilë kishin qëndruar para dere. „Nuk dinim asgjë“, ka pohuar i riu, i cili tashmë një vit është duke jetuar në Gjermani. Familja e tij, të cilës përpos babait dhe nënës, i takon edhe një vëlla tjetër, do të ketë kohë që brenda tre orësh të bajë gati valixhet. Më pas, ata janë nisur me autobus për në Hannover. Por, avioni i cili është dashur t`i dërgojë në Kosovë, ka qenë i stërmbushur, ka informuar Eduardi për „Delmenhorster Kurier“, njofton „Shtegu.com“. Pas një vozitjeje të shkurtër me autobus, familja është kthyer sërish në Schierbrok. „Polici na tha se duhet të presim edhe dy-tre javë“. Pesëmbëdhjetëvjeçari dhe vëllezërit e tij 13-, e 17- vjeçar, të cilët që nga vera janë duke vijuar shkollimin në Ellerbäke, janë shokuar dhe pikëlluar nga ngjarja. „Duam të qëndrojmë këtu“, vazhdon Eduardi. Familja kosovare e kishte lëshuar vendlindjen e saj në Prishtinë, për shkak të pasojave të luftës së Kosovës. E ëma e tyre është e sëmurë, pasi kishte qenë dëshmitare e vrasjes së një personi të cilin e kishin vrarë para syve të saj. Edhe shtëpia gjithashtu iu ishte shkatërruar“, ka përfunduar Eduardi.
Nga ana tjetër, të enjten në shkollën e mesme ka mbretëruar një dëshpërim i madh. Historia e Eltionit, Eduardit dhe Diartnisit, në të gjitha klasët ka qenë një temë. Që të tre të rinjtë kosovarë janë integruar dhe flasin rrjedhsëhm gjuhën gjermane. Përpos kësaj, Eltioni me klasën e tij, pas pak kohe do të duhet të shkojë në ekskurzion. „Ai nuk ka të drejtë të udhëtojë me ne, pasi nuk guxon të largohet shumë nga rrethina“, ka pohuar shoku i tij i klasës, Benneti. Nxënësit janë duke u përpjekur që shokët e tyre kosovarë, së paku të kenë mundësi të qëndrojnë dhe ta kryejnë shkollimin në Bookholzberg. Të enjten janë tubuar rreth 200 nënshkrime, të cilët i janë dorëzuar kryetares së Komunës, Alice Gerken-Klaas. Nxënësit gjermanë do t`i drejtohen edhe kryeministrit, Stephan Weil.