Pas përpjekjes për djegien e flamurit shqiptar UEFA gjobit Federatën Serbe të Futbollit

Pas tentativës për djegien e flamurit shqiptar, UEFA vendos sanksione dhe gjobë ndaj Serbisë

Federata Europiane e Futbollit (UEFA) ka dënuar Serbinë për veprime “raciste dhe/ose diskriminuese” nga tifozët në dy ndeshjet e Ligës së Kombeve, shkruan portali Shtegu. Gjatë ndeshjes mes Zvicrës dhe Serbisë më 15 nëntor, tifozët e jashtëm janë filmuar duke tentuar t’i vënë flakën një flamuri shqiptar. Tre ditë më vonë në ndeshjen në shtëpi kundër Danimarkës pati edhe sjellje të papërshtatshme, duke përfshirë shfaqjen e një “banderoli të paligjshëm”.

Si pjesë e sanksioneve, FF Serbe iu ndalua të shiste bileta për dy ndeshjet e ardhshme të skuadrës jashtë vendit në garat e UEFA-s. Përveç kësaj, pjesë të stadiumit duhet të mbyllen për dy ndeshje në shtëpi. Pjesët e para të sanksioneve do të hyjnë në fuqi në mars të vitit 2025, kur Serbia do të përballet me Austrinë në dy ndeshje në playoff-in e promovimit të Ligës së Kombeve.

UEFA vendosi gjithashtu gjoba prej 173 000 eurosh, nga të cilat 90 000 euro ishin për shkak të diskriminimit.