Drejtoria Kundër Terrorizmit në kuadër të Policisë së Kosovës dje ka arrestuar tre të dyshuar për terrorizëm.
Sipas policisë, të dyshuarit janë prangosur në pikën kufitare të Hanit të Elezit, pasiqë në bashkëpunim janë kthyer nga autoritetet turke përmes Republikës së Maqedonisë.
“Lidhur me këtë rast është njoftuar prokurori kompetent dhe me autorizimin e këtij të fundit janë intervistuar tre (3) të dyshuarit dhe gjithashtu si vazhdimsi e hetimeve më urdhër të prokurorit dhe të gjyqtarit të procedurës paraprake janë bastisur edhe dy lokacione të të dyshuarve” thuhet në një njoftim të policisë.
Poashtu bëhet e ditur se gjatë bastisjes në këto dy lokacione janë gjetur dëshmi relevante të cilat ndërlidhen me rastin dhe gjithashtu ndihmojnë në vazhdimësinë e hetimeve të këtij rasti.
Me urdhër të prokurorit të dyshuarit janë ndaluar në qendrën e mbajtjes për 48 orë, transmeton Klan Kosova.