www.shtegu.com > LAJME > Ndeshje ilegale futbolli në Zvicër me një mijë shikues, policia reagon me maturi (VIDEO)

Ndeshje ilegale futbolli në Zvicër me një mijë shikues, policia reagon me maturi (VIDEO)

Postuar në 22.05.2020
84 Lexime

Një lojë jozyrtare e futbollit, mbrëmjen e së enjtes ka tërhequr pothuajse një mijë të rinj në Lozanë, shkruajnë mediat zvicerane. Kjo ka ndodhur edhe përkundër faktit se tubimet masive janë të ndaluara për shkak të koronavirusit.

Policia nuk arrestoi askënd, por hapi një hetim për të identifikuar ata që janë përgjegjës për ngjarjen. „Duke pasur parasysh numrin e personave të pranishëm, ndërhyrja nga policia mund të ketë qenë kundërproduktive dhe madje e rrezikshme“, tha një zëdhënës i policisë së qytetit në Lozanë, për Radio RTS të Zvicrës Perëndimore. Policia ka mbajtur distancën e tyre për të parandaluar trazirat e mundshme, informon Shtegu.com.

Loja ilegale u zhvillua në Les Boveresses, në pjesën e sipërme të qytetit. „Ne e dinim se diçka po zhvillohej atje, por nuk e dinim vendndodhjen e saktë. Prandaj, ishte e vështirë paraprakisht të ndalohej loja“, tha zëdhënësi i policisë.

Këto lloj tubimesh mes të rinjve po organizohen nëpër rrjetet sociale. Gjatë ditëve të kaluara në Kantonin Vaud kanë ndodhur më tepër lojëra të tilla.