20:28:58 2019-05-27
Ekipi futbollistik shqiptar FC Prishtina Bern, me sukses është duke i mbrojtur ngjyrat në Ligën e dytë ndërrajonale të Zvicrës në grupin e tretë. Të shtunën do të jetë ndeshja vendimtare e saj për të siguruar ekzistencën në këtë ligë, ku është duke garuar me sukses për disa vite me radhë. Kundërshtar do të jetë ekipi i FC Lerchenfeld nga Thuni, i cili ka një pikë më pak se FC Prishtina Bern dhe radhitet në pozitën e 12-të tabelës së klasifikimit, ndërsa futbollistët shqiptarë gjenden në pozitën e 11-të.
Tre xhiro para fundit të kampionatit, FC Prishtina duhet të fitojë në çdo mënyrë që të sigurojë ekzistencën në ligë, ndërsa po që se Lerchenfeld e humb këtë ndeshje, për këtë ekip nuk do të ketë shpëtim.
E përditshmja „Thuner Tagblatt“ i ka kushtuar një artikull të tërë kësaj ndeshje, duke e quajtur ekipin shqiptar si ekip migrantësh, informon Shtegu.com.
Ndeshja do të zhvillohet në Stadiumin Bodenweid në Bernë, të shtunën në ora 19.00, ndërsa pritet përkrahje e madhe e bashkatdhetarëve tanë që në momentet më të vështira i gjendeshin pranë.