17:31:49 2019-03-16
Kombëtarja zvicerane e grupmoshave U-17 është duke luajtur për mrekulli në kualifikimet për Kampionatin Europian, që po mbahen në Serbi. Në tri ndeshje të zhvilluara, ajo ka korrur dy fitore të vlefshme, duke pësuar vetëm një humbje. Fitoren e parë e realizoi në ndeshjen kundër Serbisë (2:3), ndërsa më e merituara ka qenë debutuesja shqiptare nga ekipi i FC St. Galleni, Ardita Iseni, e cila asistoi në dy gola të realizuar në minutat 60/63.
Edhe në ndeshjen e sotme të zhvilluar kundër Rusisë, Ardita shënoi dy gola të mrekullueshëm, që Zvicrës i mundësuan të shënojë fitoren e dytë me rezultat 4:2, informon Shtegu.com. Golin e tretë e ka shënuar Yllka Kadriu nga njëmbëdhjetëmetërshi. Aktualisht, Zvicra U-17 ka 6 pikë nga tri ndeshje dhe pozicionohet në vendin e dytë të tabelës së klasifikimit, me gjasa reale për t`u kualifikuar në Kampionatin Europian.